Aşgabatda Türkmenistanyň we Hytaýyň daşary işler ministrlikleriniň arasynda geňeşmeler geçirildi

2025-nji ýylyň 15-nji ýanwarynda Türkmenistanyň DIM-de Türkmenistan bilen Hytaý Halk Respublikasynyň daşary syýasat edaralarynyň arasynda syýasy geňeşmeler geçirildi. Türkmen tarapyna Türkmenistanyň Daşary işler ministriniň orunbasary Ahmet Gurbanow ýolbaşçylyk etdi, hytaý tarapyna Hytaý Halk Respublikasynyň Daşary işler ministriniň kömekçisi Lýu Bin wekilçilik etdi.

Geňeşmeleriň barşynda syýasy-diplomatik gatnaşyklary, söwda-ykdysady we medeni-ynsanperwer ulgamyndaky hyzmatdaşlygy nazara almak bilen, ikitaraplaýyn gün tertibiniň ähli möhüm ugurlary barada we olary amaly mazmun bilen baýlaşdyrmak dogrusynda gyzyklanma bildirilip pikir alşyldy. Şunuň bilen baglylykda, iň ýokary, hökümet we pudagara derejelerdäki yzygiderli gatnaşyklaryň hemmetaraplaýyn strategiki hyzmatdaşlyga badalga berýändigi nygtaldy.

Gepleşikleriň dowamynda hytaý tarapynyň Halkara parahatçylyk we ynanyşmak ýylynyň çäklerinde meýilleşdirilýän ýokary derejeli çärelere gatnaşmagy bilen bagly meselä deglip geçildi.

Parlamentleriň we partiýalaryň arasyndaky ikitaraplaýyn gatnaşyklar barada aýtmak bilen, söhbetdeşler parlamentara dostluk toparlarynyň işiniň we bilelikdäki çärelere gatnaşmagyň ähmiýetini nygtadylar.

Daşary syýasat edaralarynyň ugry boýunça alnyp barylýan özara gatnaşyklar babatynda diplomatlar geçen ýylyň noýabrynda Çendu şäherinde gol çekilen Türkmenistanyň Daşary işler ministrligi bilen Hytaý Halk Respublikasynyň Daşary işler ministrliginiň arasynda 2025-2026-njy ýyllar üçin Hyzmatdaşlyk etmek hakynda Ähtnamanyň iş ýüzünde durmuşa geçirilmegi bilen bagly meselelere garadylar.

Söhbetdeşler Hyzmatdaşlyk boýunça türkmen-hytaý hökümetara toparynyň işiniň durnukly we uzakmöhletleýin häsiýete eýe bolan türkmen-hytaý gatnaşyklarynyň möhüm guraly bolup çykyş edýändigi bilen ylalaşdylar.

Duşuşykda söwda-ykdysady gatnaşyklary giňeltmek meselelerine aýratyn üns berildi. Bellenilşi ýaly, köp ýyllardan bäri Hytaý Türkmenistanyň iň iri daşary ykdysady hyzmatdaşy bolup durýar.

Taraplaryň özara pikirine görä, ylym, bilim, medeniýet, sungat we sport ugurlary dostlukly türkmen we hytaý halklaryny ýakynlaşdyrýan netijeli gurala öwrüldi.

Daşary işler ministrlikleriniň arasyndaky geňeşmeleriň ahyrynda taraplar ikitaraplaýyn hyzmatdaşlygyň özara gyzyklanma döredýän geljegi uly ugurlarynda netijeli gepleşikleri işjeňleşdirmäge taýýardyklaryny mälim etdiler.

* * *

Şol gün Hyzmatdaşlyk boýunça türkmen-hytaý hökümetara toparynyň Howpsuzlyk ulgamyndaky hyzmatdaşlyk boýunça kiçi toparynyň 10-njy mejlisi geçirildi.

Mejlis Türkmenistanyň Daşary işler ministriniň orunbasary A.Gurbanowyň we Hytaý Halk Respublikasynyň Daşary işler ministriniň kömekçisi Lýu Biniň ýolbaşçylygynda geçirildi.

Şeýle hem mejlisiň işine Türkmenistanyň we HHR-iň ugurdaş ministrlikleriniň we pudak edaralarynyň wekilleri gatnaşdylar.

Taraplar ozal gazanylan ylalaşyklary durmuşa geçirmek boýunça işleriň netijelerini seljerdiler, şeýle-de özara gatnaşyklaryň ileri tutulýan ugurlary boýunça ýakyn geljek üçin bilelikdäki işler barada pikir alyşdylar.

Duşuşyga gatnaşyjylar howpsuzlyk ulgamyndaky hyzmatdaşlygy giňeltmäge we çuňlaşdyrmaga meýillidiklerini tassykladylar.

Mejlisiň netijeleri boýunça Hyzmatdaşlyk boýunça türkmen-hytaý hökümetara toparynyň Howpsuzlyk ulgamyndaky hyzmatdaşlyk boýunça kiçi toparynyň 10-njy mejlisiniň Teswirnamasyna gol çekildi.